Follow Me TV

The Unbeatable

എച്ച്ഐവി മുക്തനായ ആദ്യ വ്യക്തി കാൻസർ മൂലം മരിച്ചു

എച്ച്ഐവിയിൽ നിന്ന് മുക്തനായ ആദ്യ വ്യക്തി തിമോത്തി റേ ബ്രൗൺ കാൻസർ രോഗബാധമൂലം മരിച്ചു. ‘ബെർലിൻ പേഷ്യന്‍റ്’എന്നറിയപ്പെട്ടിരുന്ന തിമോത്തി ബ്രൗൺ രക്താർബുദ ബാധയെത്തുടർന്നാണ് മരിച്ചതെന്ന് അന്താരാഷ്ട്ര എയ്ഡ്സ് സൊസേറ്റി (ഐഎഎസ്) വ്യക്തമാക്കി.

5 മാസമായി കാലിഫോർണിയയിലെ ആശുപത്രിയിൽ രക്താർബുദ ചികിത്സയിലായിരുന്ന ബ്രൗൺ വ്യത്യസ്തമായ മജ്ജ മാറ്റിവയ്ക്കൽ ശസ്ത്രക്രിയയ്ക്കു വിധേയനായെങ്കിലും രോഗത്തെ അതിജീവിക്കാനായില്ല.

നേരത്തെ എയ്ഡ്സ് രോഗത്തിന് കാരണമാകുന്ന എച്ച്ഐവി വൈറസ് മുക്തനായ തിമോത്തി മെഡിക്കൽ രംഗത്തെ ചരിത്രത്തിന്‍റെ ഭാഗമാവുകയായിരുന്നു. എച്ച്ഐവി ബാധയെത്തുടർന്ന് ആശങ്കയിലാണ്ട ലോകത്തെ ജനങ്ങൾക്ക് മുന്നിൽ പ്രതീക്ഷയുടെ അടയാളമായാണ് തിമോത്തി റേ ബ്രൗൺ അറിയപ്പെട്ടിരുന്നത്.

1995ൽ ബെർലിനിലായിരുന്നപ്പോളാണ് ബ്രൗണിന് എച്ച്ഐവി ബാധിച്ചത്. 2006ൽ രക്താർബുദവും ബ്രൗണിനെ പിടികൂടി. 2008ലാണ് രണ്ട് രോഗങ്ങളിൽ നിന്നും തിമോത്തി മുക്തി നേടുന്നത്. എന്നാൽ പിന്നീട് അർബുദം അദ്ദേഹത്തെ കീഴടക്കുകയായിരുന്നു.

എച്ച്ഐവി മുക്തനായെങ്കിലും ആദ്യഘട്ടത്തിൽ വ്യക്തിയുടെ സ്വകാര്യത സംരക്ഷിക്കുന്നതിനായി ‘ബെർലിൻ പേഷ്യന്‍റ്’എന്ന പേരിലായിരുന്നു ഇദ്ദേഹം അറിയപ്പെട്ടത്. രണ്ട് വർഷങ്ങൾക്ക് ശേഷമാണ് സ്വയം വെളിപ്പെടുത്തലുമായി തിമോത്തി രംഗത്തെത്തുന്നത്. പിന്നീട് അഭിമുഖങ്ങളും പ്രഭാഷണങ്ങളുമായി അദ്ദേഹം ശ്രദ്ധ നേടുകയും ചെയ്തു. ‘എയ്ഡ്‌സ് ചികിത്സയ്ക്കാൻ കഴിയുമെന്നതിന്റെ തെളിവാണ് ഞാൻ,’ എന്നായിരുന്നു അദ്ദേഹം 2012 ൽ എഎഫ്‌പിയോട് പ്രതികരിച്ചത്.